內容簡介

「民俗學」三個字，可以追溯到日本嘅柳田國男喺1910年發表嘅《遠野物語》。《遠野物語》記錄日本岩手縣遠野町民間傳說，成為現代民俗學重要嘅文獻。柳田國男從來冇讀過民俗學，同司馬遷寫《史記》一樣，經過遊歷聽取民間聲音而記錄落嚟，為民俗學添上另一個重要嘅符號——「在野的學說」，用廣東話解釋，即係「民間智慧」。嚟到香港，民間信仰習俗同傳說撈埋各種宗教炒埋一碟，形成獨特嘅本土文化。
今期《迴響》嘅文化專題「不問蒼天問鬼神」，探討嘅內容，正正係柳田國男追求嘅民俗學精神，嚟自民間、喺民間傳播，並冇話咩先係正史正統，總之傳統係咁就係咁。有趣嘅係，「傳統」都會演變，今日嘅「傳統」，到一百年後會係另一個面貌。有人話去到外地要尋根，可能尋找嘅根，就係民俗文化嘅根本。呢一期，大家一齊追本溯源，尋找香港本土嘅根。