內容簡介

2023年，香港派台嘅流行曲超過900首，除咗樂迷深愛嘅夕爺Wyman，仲有大量填詞人撐起咁龐大嘅歌曲量，同樣值得認識同埋欣賞。廣東歌成為香港流行曲嘅主流，經過一個漫長過程。有人夢想成為填詞人，結果做咗成功嘅編劇同導演，兜個圈再圓填詞夢。由《填詞L》引發嘅填詞熱，經過長時間嘅累積，以及無數填詞人默默努力。
今期《迴響》請到填詞人梁栢堅分享入行十八年嘅心路歷程、訪問香港電影金像獎獲獎填詞人aka《填詞L》導演兼編劇黃綺琳，仲請到「香港業餘填詞人協會」負責人黃文廣，為我哋補上淹沒喺呢片詞海嘅碎片。特設番外篇，由一郎介紹香港主流以外嘅同人填詞世界。

關於廣東歌、歌詞，仲有無數話題未能照顧到。原諒我哋今期做到嘅有限，做個小專題，為香港填詞人打氣。